“Omo de Rebi” parla di Rovigo, Treno Rossoblu, Cooperative e Toca Magna & Bevi.
Bonasera.
A gò visto che ghè ’sto spazio novo sul blog Rebi Rovigo e che se poe scrivare qualcossa. Me permeto de farlo, siori. Che beo sentirse acolti ben, zio rebista!
Ma… ma… mi domando e digo… a gò leto ‘ncuò un articoeo sul Gazzetin e ieri sul Carlin (el giornae, no el zogadore, ahn) che i gà fato ’sta riunion del Trenorossoblù. Vardè, par mi se qualchedun el se inventa ‘na bea iniziativa par tirarne fora… insoma… no voio dire dee brute paroe… disemo dai problemi, va… sò anca contento. Ma ghè un fià de ma co ’sto Treno. no sè cussì semplice, zio brasoea. E po! A cossa serve fare ‘na nova società se dentro i resta i soiti che i gà fato tute ’ste rogne? Zerto, se el Treno el me mete dentro dee persone nove, dea zente profesionista in tea gestion dea società, in tel marketing e tute e robe ca serve… aeora podarìa zà essare meio. Eeeeeeeeeeeeeh ciò… se gà da pensarghe ben, digo mi.
A gavarìa anca ‘n’altra robeta da far notare. ‘Sta società de desso ea dovarìa tratare coi guantini bianchi, e anca de veudo, i tosi de Rovigo che i zoga in tea squadra: vardè, siori dea società, che lori i sè più importanti de tuti i stranieri de ’sto mondo. I sè el futuro, i sè ea passion pai nostri coeori! MINA DARLI PER SCONTA’. No se poe dar tanti schei a domila stranieri, tanti anca un fià brocchi, e far ‘ndar via i tosi de Rovigo. Ve dago un
consilio, siori dea società: zinque, digo 5 e no uno de più, stranieri BRAVI, zio foresto, e el resto… roba rovigotta! Da tirar su ben in tee giovanii! Tachemo a tegnere qua Reato, Di Maura, Bacchetti e via discorendo.
A digo… a ghin voe mina ‘na laurea par capire ’ste robe.
Scuseme par ’sta letera longa, ma a gò el magon par ’sta Rebi Rovigo!
Ve saeudo.
Omo de Rebi (omoderebi@libero.it)
A fago un P.S. e po a vago a magnare. El torneo Toca magna e bevi lè stà beissimo, el terzo tempo po… no ve digo! A gò baeà fin mi! Se dovarìa organizare più speso ’ste manifestazion. ‘Na roba granda!
Tag: andrea bacchetti, bersaglieri, blog, cooperativa, norman di maura, omo de rebi, rossoblu, rovigo, rugby, rugby rovigo, rugby rovigo blog, rugby rovigo.blog, rugbyrovigo.blog, tocca magna e bevi, tommaso reato, treno rossoblu
