Bonasera omani e done del Blog dea Rebi Rovigo.
A vedo che no gavemo ancora trovà ‘na via propio propio definitiva in tea Rebi Rovigo. L’è tuto in alto mare, zio Coop!
Cussì, visto ca no podemo dire tanto finchè no semo sicuri (vedemo ’sta roba de Schinca se ea va ben, zio estremo)… no posso fare altro che mandarve i me saeuti dae me ferie, che ve digo… e s’è veramente bee. A mi me piase el mare, ea montagna, e cità, Italia e anca estero, ma me more qualcossa dentro se no gò sempre un fio direto col rebi. Cussì gò ciapà l’ereo e sò vignù in tel emisfero australe, zio maori!!!! Par ’sta setimana a sò in tee isoe Fiji, ea prosima vago in Samoa. Oh fioi, se cato un bel toson rebista bravo a veo porto!
Ve conto, ve conto. A sò in tenda, me fago ea carne sul barbecue in campegio quando ca gò nostalgia dee brasoe de Nino Rossi. A gò coinvolto tuti i abitanti dea zona, se godemo un pasto, a gò imparà fin qualche paroina in figian! Qua a ghè i putini maoreti che i zoga a rebi sua spiaia coe nose de cocco. E mi a zogo co lori… Beo qua, propio beo!
Vorìa però intanto congratuearme col grande Nino Rossi. A gò savesto che el gà vinto un torneo de golf, e anca un bel torneo serio! Che omo sportivo! Bravo Nino, complimenti!
A magno ‘na nose di cocco aea so saeute! E aea vostra. Per pensare al Poesine me so portà via un bel toco de pinza onta coe cicioe, ma in ereo meo so magnà tuto. E ‘ndemo de nose de cocco!
Ve saeudo.
Omo de rebi (omoderebi@libero.it)
Tag: bersaglieri, cocco, cooperativa, fiji, nino rossi, noci di cocco, omo de rebi, polesine, rossoblu, rovigo, rugby, rugby rovigo, rugby rovigo blog, rugby rovigo.blog, rugbyrovigo.blog, samoa
