Immediato l’intervento di Omo de Rebi sulla partita dell’Italia…
“A fasemo ridare el poeame, zio vampiro! No ea sarà mina ‘na vitoria questa, ahn?? Un fià de orgollio…”
Bonasera amizi dea Rebi Rovigo.
Scuseme… mi no voio essare cativo come ‘na iena, ma… me vien propio da ridare… no riesso a tegnerme, a me spanzo dae risate! A so’ sta a Marsillia quatro dì fa e par no pianzare daea vergogna, me so’ scoeà un fiascheto del vin rosso ca me so’ portà da casa… ‘desso a vardo ’sta Romania-Italia in teevision e me vien ancora più da pianzare… A fasemo ridare el poeame, zio vampiro!
Mi me domando e digo: dove s’è ca voemo ‘ndare? Mi a seraria qua ea facenda, tornemo a casa e che ea sia finia, parchè mi un fià anca a me vergogno.
Gò anca da dire che a Marsillia me so’ godesto un mucio, ea roba pezo s’è sta soeo ea novea cusina francese che, fioi, inveze de riempirme ea panza, mea svodava ancora de più: mi no so, s’è più boni i crec del muino bianco, zio siampagn! Gnan da metare a confronto
coe brasoe e coe tajadee al ragù de Nino Rossi, ahn!
I neozeandesi i s’è ‘na roba granda, ‘na roba dove ca no rivaremo mai, ma gò anca da dire che ea nostra nazionae no ea gà vù gnan un fià de dignità, osteria. Me sa anca che i maoreti i ne toeva un fià pa’l dedrio, e te credo, sacramento, i nostri i pareva dei zombi! Un fià de orgollio, un cincinin almanco! Gninte! A parte el toso Bergamasco e el soito Troncon che, poareto, ogni tanto el saltava fora. Pal resto… Comunque gò visto ancora ‘na gran bea umanità, un mucio de zente foresta che ea se godeva un pasto, no parlemo dei argentini che i gà fato propio ‘na roba granda e i gà festegià mina poco.
Ma stasira po… No ea sarà mina ‘na vitoria questa, ahn?? No voio pensare a cossa che ne farà i siori col kilt aea fine de ’sto mese!
Va eà va eà, vago a lezzarme el libro del conte Dracuea, a ’sto punto. Cussì me fago ‘na cultura transilvana.
Ve saeudo.
Omo de rebi (omoderebi@libero.it)
Tag: Azzurri, blog, conte vlad, dracula, marsiglia, mauro bergamasco, mirko bergamasco, nazionale italiana, nino rossi, omo de rebi, romania, rossoblu, rovigo, rugby, rugby rovigo, rugby rovigo.blog, rugbyrovigo.blog
