Omo de Rebi: “L’è tornà el spirito bersalliere”

“Mi ‘desso a spero che in te chea Fir a cambia qualcossa”.

“Vardè che el biondin Basson l’è ‘na roba granda”

Bonasera a tuti.
Osteria! Ma varda che lavoro! Che beo ’sto blog novo! So’ contento de mandare anca qua ‘n altro comento! Par mi l’è un’inaugurazion.
Gò anca da farghe i complimenti al sior Scai e a quei del Comune, insoma, a tuti quei che i gà organizà chel bel feston in piaza Vitorio in ’sti dò dì, zio feice. Finalmente ‘na bea iniziativa, un fià de casotto, un fià de bocia che i gà podesto provare a zugare a rebi.
E tute quee teevision, quante seree? Vinti? Chea strazona, tuti in piaza bei sentà comodi in tee careghe a vardarse ea partia(zza) Italia-Scozia sabo de sira come sa fusimo in saeoto! Me s’è propio piasesto. Mi po a me so’ vardà anca chealtre partie, ciò.
Se ea prosima volta Nino Rossi po l’organiza anca un so stend dove chel fa e brasoe o el musseto da asporto… saria el paradiso terestre, chea strazona!!!!
Se gò propio da fare anca ‘na confesion, ve digo ca gò fin provà a fare ea haka co i dò toseti dea Nova Zeanda… va ben, zio sportivo, lori i iera più bei de mi, eo so! No stasì torme pa’l dedrio, ahn…..
‘Scoltè, ghe ne parlo ‘desso, po veramente basta, ca ghe n’ho do zebedei ca no podì gnan imaginarve… Mi ‘desso a spero che in te chea Fir a cambia qualcossa, parchè zio rebista… no se poe più fare ‘na nazionae cussì… E co ’sta riflesion profonda, a sero el discorso.
Passemo a ieri, el toco più beo! Bravo Rovigo, zio Basson da Granzette!
Bravo! Bravo! E de novo bravo! I tosi i gà ‘na voia de zugare, de vinzare, de rompare i bisi a tute quee squadrete che e se crede i guru del rebi! Mi a penso che i tosi i ghe riusirà, i farà un casoto in te ’sta clasifica ’st’ano…. Vardè che el biondin Basson l’è ‘na roba granda, el zoga mina da scherzi.
El bamboeoto Immelman l’è sempre in mezo, bravo fioeo! Pepe Scana l’è in forma, el gà fato dee gran bee robe… E anca el toso un fià peatin, Carlin Ayala, el me pare tornà bon! El nove Legora l’è un spuzzoeo, complimenti anca a lù. Insoma… a me vien fin da pianzare, me comuovo a vedarli cussì. Coa grinta, col spirito bersalliere.
Dasine de novo ’sta gioia, fioi rossi e fioi blu!
Ve saeudo, ca gò el magon daea feicità.

Omo de rebi (omoderebi@libero.it)

Tag: bersaglieri, carlin ayala, nino rossi, omo de rebi, rossoblu, rovigo, rugby, rugby rovigo, rugby rovigo blog, rugby rovigo.blog, rugbyrovigo.blog, stefan basson