Omo de Rebi: “Battaglini, renio de soferenza e feicità”

Bonasera amizi rossi e blè.
A so’ senza paroe, a so’ senza vose. A so’ feice. Qua nissuni ne dava dò schei e varda chì che lavoro… A gò da ringrasiare ’sti tosi che i s’è drio lavorare cussì tanto par far rinassare ea Rebi Rovigo. A gavemo propio del bon in tel di-ene-a, ghe poco da fare. I fioi i s’è drio rodarse, anche quei foresti, me sa che soeo el toso Basson el gabia da tore un fià e misure. Pepe Scana el gà fato un fià el furbeto, ciò, ma dito tra mi e voialtri… ea ghe stava anca, zio agro, parchè i padovani i ne gà fato un mucio de punti cussì, senza gnan movare un deo del piè, chea strazona! El bamboeoto Immelman l’è tosto, el toso ex radeceto Faiva el gà dò zebedei cussì, no parlemo del Legorin… a momenti el ne va ben fin come taeonatore! A gò stima profonda del so rito quando ca Pepe Scana el tira i piazati: el se gira, el se senta par tera e no’l varda!
‘Sta roba ea voe dire che l’è un omo de cuore, zio scaramantico. E mi a gò rispeto coea ere granda! Insoma dai, disemo che i s’è stà bravi e orgolliosi tuti. I s’è come se i fusse i me fioi.
L’unica robetina che me s’è un fià mancà s’è ’sta ‘na scazotadina… anca picoea… inveze gnan un s-ciafon, un spintonzin… Zio sberla! A semo diventà dissiplinati, lori inveze i
iera in canon!
A gò festegià, amizi cari, co ‘na bea piadinozza coea salsicia e ea zegoea (anca dò, tre peperoni me so’ fato zontare). E po a so’ passà ae giostre e me so’ fato un giro sui autoscontri, zio Brucomea! A so’ tornà indrio coi ani. Me so’ conceso fin un salto in tea roda panoramica, par vardare dal’alto el campo più beo e comovente de ’sto mondo. El Battaglini, renio de soferenza e feicità, de lagreme e sbigatamenti dal ridare, de sienzi disperà e de zighi de gioia. Un renio che anca in tee dificoltà, no’l gà mai
fine! Soeo dei novi inizi.

Ve saeudo, a so’ comosso. Omo de rebi (omoderebi@libero.it)

Tag: bersaglieri, blog, gianluca faliva, juan cruz legora, omo de rebi, rovigo, rugby, rugby rovigo, rugby rovigo.blog, rugbyrovigo, rugbyrovigo.blog, stadio mario battaglini, stefan basson